مملكة الإبداع

إنها مملكة أهديها إلى أعز الناس، وأحب الناس، وأغلى الناس، فهي من أرشدتني إلى إنشائها وإليها أهدي كل الكلمات..

كلمتين من قلبى يا مصر

بين وجوه الناس فى الجاية والرايحة

دورت بعينى اشوف منين ألاقى فرحة

وهتيجى منين فرحتى وسط ناس نايمين

على قوت عيالهم ورزقهم يوم بيوم دايرين

لو قلتلهم مصيبة هيقولولى دى نايبة

متكبرش الأمور عايزين حياة هادية

طب والمرتشى والحرامى .. دول رئيس ووزير؟؟

يعنى مهما قلنا .. مفيش أى تغيير

ويبصولى نظرة طويلة .. انت عامل فيها كبير عيلة؟!

روح شوفلك حاجة تعملها .. يا تقفل على دى سيرة

وبين اخواتى واصحابى وحبايبى .. على قلب واحد ومغنى حزاينى

قعدنا نحسب .. نجيبها يمين نجيبها شمال.. نخرج عليهم، ولا البخت مال؟

ليه منقولش لا ولو مرة؟! .. نسيبنا م الجرة ونطلع لبرة

مش هكون سلبى ولا خسيس وجبان .. همسح الظلم من بنى الانسان

ويومها ضربونا .. أهانونا شتمونا .. جرحونا قتلونا

وزاد اصرارنا وعرفنا .. للصمود عنوان!

ولأن الظلم صورة مرسومة فى الأذهان .. ولأن الناس داقوا المر وياما شعبى اتهان

قالولنا ارجعوا.. رجالة مصر انتهوا من زمان!

ومحدش فينا فكر يرجع .. وصرخنا مين مع الحق ومين هيركع

لقينا زئير أسود بتقول معاكم .. نرج الأرض بالتكبير وأرواحنا فداكم

وكسرنا قيود الذل .. حررنا بلدنا من الظلم من الطغيان

كسبنا احترام الكل .. باركولنا بكل اللغات والألسان

هى دى بلدى .. مصر اللى أعرفها من آلاف السنين

مصر اللى عشت بتمنى أشوفها .. مصر اللى ملتنى شوق وحنين

النهاردة رفعت راسى .. خلاص مفيش تمييز

وسط أمريكى وإيطالى .. حتى الإنجليز

رفعت راسى وقلت عشتى يا بلدى حرة

دة انتى عندى غالية جدا .. انتى عندى اغلى درة

كلمتين من قلبى ليكى أرد بيهم أى جميل

دلوقت بس يا بلدى هقول .. إن مفيش زيك مثيل!!

**********************

بقلمى

2 التعليقات:

قصيدة رائعة فاجأتنا بها يادكتور
لون جديد وتتعدد لابداعاتك الرائعة
تقبل مروري واشادتي بأسلوبك الراقي
تحياتي لك

 

السلام عليكم ،

رائعة جداً يا دكتور ،
والأسلوب فوق الرائع ..

نفتقد إبداعتك ،
دمت بكل الخير ..

 

إرسال تعليق